میرٹھ، بھارت / مانیٹرنگ ڈیسک: بلند شہر سے تعلق رکھنے والی 35 سالہ خاتون نے اپنے شوہر پر الزام عائد کیا ہے کہ وہ گزشتہ تین سال سے اپنے دوستوں کو اس کا ریپ کرنے کی اجازت دیتا رہا اور اس دوران سعودی عرب میں بیٹھ کر ویڈیو ریکارڈنگ دیکھتا رہا، جہاں وہ کام کرتا ہے۔
متاثرہ خاتون، جو اس وقت ایک ماہ کی حاملہ ہیں، نے بتایا کہ اس کی شادی 2010 میں گلاوتھی، بلند شہر کے رہائشی سے ہوئی تھی اور وہ چار بچوں کی ماں ہے – دو بیٹے (13 اور 3 سال کے) اور دو بیٹیاں (11 اور 7 سال کی)۔ اس کا شوہر سعودی عرب میں ایک آٹوموبائل مکینک کے طور پر کام کرتا ہے اور سال میں ایک یا دو مرتبہ گھر آتا ہے۔
اپنی پولیس شکایت میں خاتون نے کہا کہ تین سال قبل اس کا شوہر دو دوستوں کے ساتھ گھر آیا اور انہیں اس کے ساتھ زیادتی کرنے کی اجازت دی۔ "یہ دونوں مرد بلند شہر کے اسی علاقے میں رہتے ہیں، اور وہ میرے شوہر کی غیر موجودگی میں بھی مجھ پر حملہ کرتے رہے اور اپنے اعمال کی ویڈیو ریکارڈنگ کرتے رہے۔ جب میں نے اپنے شوہر سے شکایت کی تو اس نے مجھے خاموش رہنے کو کہا کیونکہ وہ ان لوگوں سے پیسے لیتا تھا۔"
متاثرہ خاتون نے مزید کہا کہ "میرا شوہر سعودی عرب میں بیٹھ کر اپنے موبائل فون پر یہ ویڈیوز دیکھتا تھا۔ میں اپنے بچوں کی خاطر خاموش رہی کیونکہ وہ مجھے طلاق دینے کی دھمکی دیتا تھا۔"
حال ہی میں، خاتون اپنے خاندان کے ساتھ بلند شہر کے سینئر سپرنٹنڈنٹ پولیس شلوک کمار سے ملی اور اپنی شکایت درج کرائی۔ ایس ایس پی شلوک کمار نے بدھ کو بتایا کہ شکایت موصول ہو چکی ہے اور تحقیقات جاری ہیں۔
انہوں نے کہا، "چونکہ یہ معاملہ تین سال پرانا ہے، اس لیے مقامی پولیس اس کی مکمل تحقیقات کرے گی اور اس معاملے میں مناسب کارروائی کی جائے گی۔"