دوبئی / مانیٹرنگ ڈیسک: دبئی انٹرنیشنل کرکٹ اسٹیڈیم، جسے "رنگ آف فائر" بھی کہا جاتا ہے، پاکستان اور بھارت کے درمیان سنسنی خیز مقابلے کی میزبانی کے لیے تیار ہے، جبکہ شائقین بھی بھرپور جوش و خروش کا مظاہرہ کر رہے ہیں۔
دبئی میں حالیہ دنوں میں رات کے وقت خنک ہوائیں چل رہی ہیں، لیکن کیا اتوار کو بارش کا امکان ہے؟ یہ سوال کئی شائقین کے ذہن میں گردش کر رہا ہے۔ منگل، 18 فروری کو دبئی میں بارش ہوئی تھی، جس نے بھارت اور بنگلا دیش کے میچ پر بھی خدشات پیدا کر دیے تھے۔ اسی دوران، راس الخیمہ کے جبل جیس میں بارش اور اولے بھی پڑے، تاہم بھارت اور بنگلا دیش کے میچ پر اس کا کوئی اثر نہیں ہوا۔
محکمہ موسمیات کے مطابق، پاکستان اور بھارت کے درمیان ہونے والے اس بڑے مقابلے میں بارش کے امکانات برقرار ہیں۔ اتوار کی رات اور پیر کی صبح دبئی میں جزوی طور پر ابر آلود موسم اور ہلکی بارش متوقع ہے، لیکن ماہرین کا کہنا ہے کہ اگر بارش ہوئی بھی تو مختصر وقت کے لیے ہوگی، جس سے میچ متاثر ہونے کے امکانات کم ہیں۔
اتوار کو دبئی میں درجہ حرارت دن کے وقت 33 ڈگری سینٹی گریڈ جبکہ رات کے وقت 20 ڈگری سینٹی گریڈ رہنے کا امکان ہے۔ واضح رہے کہ آئی سی سی چیمپئنز ٹرافی 2025 کے قوانین کے تحت گروپ اسٹیج میچز کے لیے کوئی ریزرو ڈے مقرر نہیں کیا گیا۔
اس کے باوجود، شائقین پر امید ہیں کہ اگر ہلکی بارش بھی ہوئی تو یہ میچ کے لطف کو کم نہیں کرے گی اور پاک بھارت مقابلہ ایک یادگار کھیل پیش کرے گا۔