راولپنڈی/ مانیٹرنگ ڈیسک: اڈیالہ جیل میں 9 مئی کے جی ایچ کیو حملہ کیس کی سماعت کے دوران بانی تحریک انصاف عمران خان اور عوامی مسلم لیگ کے سربراہ شیخ رشید کے درمیان ملاقات ہوئی۔
کیس کی سماعت کے بعد میڈیا سے بات کرتے ہوئے شیخ رشید نے بتایا کہ یہ ملاقات ایک طویل عرصے کے بعد ہوئی۔ انہوں نے کہا کہ عمران خان نے انہیں گلے لگایا اور خوش دلی سے بوسہ دیا۔ شیخ رشید نے مزید کہا کہ کمرہ عدالت میں عمران خان کے ساتھ طویل گفتگو ہوئی اور اس ملاقات نے انہیں بے حد خوشی دی۔انہوں نے عمران خان کے ساتھ اپنے تعلق کو مثبت انداز میں بیان کیا اور کہا کہ بانی پی ٹی آئی نے گرمجوشی سے ان سے ملاقات کی۔ اس ملاقات کے دوران کئی موضوعات پر بات چیت ہوئی، جسے شیخ رشید نے یادگار قرار دیا۔