ایران میں فائرنگ سے سپریم کورٹ کے دو ججز ہلاک

 تہران: ایران کے دارالحکومت میں سپریم کورٹ کے باہر فائرنگ کے واقعہ میں دو جج جان کی بازی ہار گئے۔ایرانی میڈیا کے مطابق تہران کے مصروف علاقے تہران اسکوائر میں سپریم کورٹ کے قریب ایک مسلح شخص نے فائرنگ کی، جس کے نتیجے میں دو جج، علی رازینی اور محمد مغیثی، جاں بحق ہوگئے۔ یہ دونوں جج قومی سلامتی، جاسوسی، اور دہشت گردی سے متعلق مقدمات کی سماعت کرتے تھے۔

رپورٹس کے مطابق فائرنگ کے دوران ایک جج زخمی بھی ہوا، جبکہ حملہ آور نے بعد میں خود کو گولی مار کر اپنی زندگی کا خاتمہ کر لیا۔ مزید یہ کہ جج علی رازینی پر 1998 میں بھی ایک قاتلانہ حملہ ہوا تھا، جس میں ان کی گاڑی میں بم نصب کیا گیا تھا، تاہم وہ اس حملے میں زخمی ہو کر بچ گئے تھے۔