اسلام آباد/ مانیٹرنگ ڈیسک: پاکستان تحریک انصاف (پی ٹی آئی) کے ذرائع کے مطابق، چیف جسٹس نے پارٹی کو مشورہ دیا ہے کہ وہ نظام کا حصہ بنی رہے اور بائیکاٹ سے اجتناب کرے۔ذرائع کے مطابق، جمعہ کے روز چیف جسٹس سے ملاقات کرنے والے وفد کو بتایا گیا کہ پی ٹی آئی کو سپریم جوڈیشل کمیشن کے حالیہ اجلاس کا بائیکاٹ نہیں کرنا چاہیے تھا، کیونکہ اس اجلاس میں سپریم کورٹ کے ججوں کی تقرریوں پر غور کیا جا رہا تھا۔ وفد کے ایک رکن نے نام نہ ظاہر کرنے کی شرط پر بتایا کہ اگر پی ٹی آئی اجلاس میں شرکت کرتی تو عدالتی تقرریوں میں کچھ تبدیلیاں ممکن تھیں۔
پی ٹی آئی چیئرمین بیرسٹر گوہر خان نے اس بات کی تصدیق کی کہ چیف جسٹس نے پارٹی کو عدالتی تقرریوں کے عمل کا بائیکاٹ نہ کرنے اور سسٹم میں شامل رہنے کا مشورہ دیا۔ ملاقات میں شریک ایک اور رہنما نے بتایا کہ چیف جسٹس کا مؤقف تھا کہ پی ٹی آئی کی شرکت سے سپریم کورٹ کی بعض تقرریوں پر اثر پڑ سکتا تھا۔