لاہور / مانیٹرنگ ڈیسک: جنوبی افریقی بلےباز ڈیوڈ ملر نے آئی سی سی چیمپئنز ٹرافی میں سابق بھارتی کرکٹر وریندر سہواگ کا 23 سال پرانا ریکارڈ توڑ دیا۔
بدھ کے روز قذافی اسٹیڈیم، لاہور میں نیوزی لینڈ کے خلاف دوسرے سیمی فائنل میں، ملر نے چیمپئنز ٹرافی کی تاریخ میں تیز ترین سنچری کا نیا اعزاز حاصل کیا۔ انہوں نے 363 رنز کے ہدف کے تعاقب میں میچ کی آخری گیند پر 2 رنز مکمل کرتے ہوئے 67 گیندوں پر اپنی سنچری مکمل کی، تاہم وہ اپنی ٹیم کو جیت نہ دلا سکے۔ ان کی ناقابل شکست 100 رنز کی اننگز میں 10 چوکے اور 4 چھکے شامل تھے۔
اس سے قبل، بھارتی اوپنر وریندر سہواگ نے 2002 میں انگلینڈ کے خلاف کولمبو میں 77 گیندوں پر سنچری بنا کر یہ ریکارڈ قائم کیا تھا۔ چیمپئنز ٹرافی 2025 کے دوران، 22 فروری کو آسٹریلوی وکٹ کیپر جوش انگلس نے بھی انگلینڈ کے خلاف 77 گیندوں پر سنچری بنا کر سہواگ کا ریکارڈ برابر کر دیا تھا، لیکن اب ملر نے یہ ریکارڈ توڑ دیا ہے۔
میچ کے دوران، نیوزی لینڈ نے پہلے بیٹنگ کرتے ہوئے 6 وکٹوں پر 362 رنز بنائے، جس کے جواب میں جنوبی افریقی ٹیم 50 اوورز میں 9 وکٹوں کے نقصان پر 312 رنز تک محدود رہی اور 50 رنز سے شکست کھا بیٹھی۔
چیمپئنز ٹرافی 2025 کا فائنل 9 مارچ، اتوار کو دبئی میں بھارت اور نیوزی لینڈ کے درمیان کھیلا جائے گا۔